Jónas Sen er með meistaragráðu í tónlistarfræðum (Performance Studies) frá tónlistardeild City University í London, auk meistaragráðu í mennta- og menningarstjórnun frá Viðskiptaháskólanum á Bifröst. Hann lauk einleikara­prófi frá Tónlistarskólanum í Reykjavík og nam jafnframt píanóleik hjá Monique Deschaussées í París og Carolu Grindeu í London.

Hann starfaði sem tónlistargagnrýnandi við Fréttablaðið á árunum 2010–2023 og hefur ritað fjölmargar greinar um tónlist í ýmis dagblöð og tímarit, þar á meðal Pressuna, Eintak, Morgunpóstinn, Alþýðublaðið, DV, Morgunblaðið, Mannlíf og Tímarit Máls og menningar.

Samstarf við Björk
Jónas hefur unnið náið með Björk Guðmundsdóttur. Hann var hljómborðsleikari á tónleikaferðalagi Bjarkar um heim allan 2007–2008 og tók einnig þátt í hluta af tónleikaferð hennar í kjölfar útgáfu plötunnar Biophilia. Í samstarfi sínu hafa þau útsett og umritað fjölda laga Bjarkar fyrir hljómborðshljóðfæri, meðal annars á iPad og iPhone útgáfu Biophiliu. Nýrri útsetningar frá þeim komu út í júní 2017.

Tónsmíðar fyrir leikhús
Jónas hefur samið tónlist fyrir leikhúsverk, m.a. The Black Spider eftir Gabrielu Friðriksdóttur sem sýnt var í Zürich 2008. Hann samdi einnig tónlist ásamt Valdimar Jóhannssyni fyrir H, an Incident, frumsýnt í Brussel 2013, sem ferðaðist víða um Evrópu í kjölfarið. Saman sömdu þeir tónlist fyrir Svartar fjaðrir eftir Sigríði Soffíu Níelsdóttur, sem var opnunarsýning Listahátíðar í Þjóðleikhúsinu 2015. Fyrir þá tónsmíð hlutu þeir tilnefningu til Grímuverðlaunanna. Jónas er ennfremur höfundur tónlistarinnar við sviðsverkið Til hamingju með að vera mannleg eftir Sigríði Soffíu Níelsdóttur, sem var frumsýnt í Þjóðleikhúsinu 19. apríl 2023.

Sjónvarpsþættir
Jónas hefur stýrt fjórum sjónvarpsþáttaröðum á RÚV: Tíu fingur, Átta raddir, Tónspor og Tónahlaup. Fyrstu þrjár voru allar tilnefndar til Edduverðlaunanna. Fjórða þáttaröðin, Tónahlaup, var sýnd haustið 2015.

Raftónlist og frekari tónsmíðar
Jónas semur einnig raftónlist og hefur flutt hana á Extreme Chill hátíðinni og Iceland Airwaves. Hann samdi tónlist fyrir dansverkið FUBAR eftir Sigríði Soffíu, sem frumsýnt var í Gamla bíói 26. október 2016. Saman fluttu þau sérstaka tónleikaútgáfu FUBAR á Airwaves sama ár. Fyrir tónlistina var Jónas tilnefndur til Grímuverðlaunanna 2017, og Sigríður Soffía var tilnefnd sem dansari ársins. Verkið var svo sýnt víða um land í kjölfarið.

Aðrir tónlistarviðburðir
Jónas kom fram með Philip Glass og píanóleikurunum Vicky Chow, Jenny Lin og Madeline Hildebrand á tónleikum í Winnipeg 28. janúar 2018, þar sem fluttar voru allar etýður Glass.

Ritstörf, sjónvarpstónlist og kennsla
Bók Jónasar um píanóleikarann Halldór Haraldsson kom út haustið 2017. Hann samdi líka tónlistina við sjónvarpsþáttaröðina Óminni, sem sýnd var á Stöð 2 haustið 2019, og við þáttaröðina Fólk eins og við, sem sýnd var á Stöð 2 í ársbyrjun 2024.

Auk þess starfar Jónas sem kennari í píanóleik við Tónmenntaskóla Reykjavíkur og Tónskólann í Reykjavík. Í frístundum er hann einnig listmálari og salsadansari. Loks hefur hann samið fjölda laga við trúarlega texta sem reglulega eru sungin í messum hjá Karmelsystrum, og er geisladiskur með þeim lögum í vinnslu.

Netfang: senjonas@gmail.com